ICCA Exam Review (Arabic)

بسم الله 

الحمدلله حصلت شهادة ICCA، كأول شهادة لي في مجال الحوسبة السحابية، وتعتبر شهادة سهلة نوعا ما، تعطي مقدمة عن الحوسبة السحابية، ايش هي بالضبط؟ ليش نحتاجها، كيف نستفيد من الخدمات المقدمة، وكذا.

اللي يميز هذه الشهادة إنها vendor neutral، بمعنى إنها ما تشرح على مقدم خدمة حوسبة واحد فقط، بل على 3 من أشهرهم، وهم:

Google Cloud Platform GCP

Amazon Web Services AWS

Microsoft Azure

وتعطي نظرة عن كيف كل واحد منهم يشتغل، وفيه لابات مختلفة تشرح كيف نتعامل مع كل واحد فيهم، وهكذا، لكن على العموم في المفهوم الأساسي في تشابه كبير بينهم، وفي المسميات فيه تشابه كبير بين قوقل ومايكروسوفت، اللي فيها اختلاف هي سحابة أمازون. 

درست محتوى الشهادة من مقدم الشهادة نفسها وهم iNE، واللي يشرح الكورس شرحه واضح، ومُسلّي جدا، فما في ملل من ناحية الفيديوهات. 

اللابات اللي في الكورس مشروحة مره كويس، وما تحتاجون غيرها في التجهيز للاختبار. 

نجي الحين لأهم نقطتين: كيف أذاكر للاختبار؟ كيف كان الاختبار؟

كيف أذاكر للاختبار؟

زي ما قلت فوق أنا ما استخدمت إلا فقط الفيديوهات اللي موجودة في الموقع كمصدر للشرح، ولو كان فيه نقطة ما فهمتها ممكن أبحث عنها وأفهمها كويس، لكن ترى ما بيصير هذا كثير، لأن الشرح ممتاز.

فكنت معتمدة على الفيديوهات، والسلايدات اللي موجودة في الموقع.

فيه نقطة مهمة جدا جدا !!!

بتلاحظون إن السلايدات محتواها قليل جدا وبسيط، لكن ترى الاختبار ما هو بهذه البساطة، وبتلاحظون إن وقت الشرح، الشارح يسترسل، شفتوا كلامه واسترساله، هو لب الموضوع ولازم تدونونه في الملاحظات، وتكونون جدا جدا مركزين في الشرح. أما لو اعتمدتوا فقط على محتوى السلايدات، فهذا غلط كبير. 

قبل الاختبار اللي زدته إني قرأت الـshared responsibility model لمقدمين الحوسبة السحابية اللي درسناهم، GCP و Azure و AWS، قرأت ما حفظت، فقط مريت عليها، وأنصحكم تسوون كذا. وهذا هو المصدر الخارجي الوحيد اللي قرأته من خارج الكورس في iNE. 

كيف كان الاختبار؟

الاختبار ما كان سهل، ولا كان صعب. 

المهم في الاختبار إدارة الوقت زين، الاختبار كان 46 سؤال نظري، و 4 أسئلة عملي، يعني 50 سؤال تحلونها في ساعه ونص بالضبط، ولازم إنتم بنفسكم تسلمون الاختبار قبل ينتهي الوقت، يعني لو انتهى الوقت قبل ما تسملون الاختبار، تعبترون فشلتوا فيه، فضروري تضغطون submit.

العملي فقط بيكون على AWS، لذلك تدربو عليها كوييييس، عيدو لابات أمازون مرة ومرتين وثلاثة، حتى تحسون إنكم مرتاحين مع واجهتهم وبإمكانكم تشتغلون براحة، وترى هي سهلة جدا والتعامل معها بسيط، المهم تعيدون حتى ترتاحون على الاستخدام وتصيرون سريعين وتمام. 

في الاختبار أسئلة العملي بتكون نفس اللي تدربتوا عليه باللابات، ولو زادو شيء من خارجها بيكون شيء بسيط جدا ومقدور عليه فلا تشيلون هم نهائي. 

قسم العملي في الاختبار مفصول تماما عن النظري، يعني بإمكانكم تبدأون بالعملي، أو تحلونه بنص الوقت، أو تحلونه آخر شيء، اللي يريحكم. وممكن بعد ما تحلونه ترجعون له أي وقت خلال الاختبار، لو مثلا ما حليتوا كل الأسئلة مره وحدة، أو بتراجعون. 

أهم شيء الوقت الوقت، امشوا في النظري بسرعة قد ما تقدرون، حلو كل سؤال بتركيز، ثم علطول امشوا للي بعده، ولو في سؤال وقفتوا عنده حطو عليه علامة وكملوا حتى الأخير، ثم ارجعوا لها لو في وقت كافي فكروا فيها، أو حطو أي إجابة، لا تتأخرون عند الأسئلة اللي ما تعرفونها علطول، هذا مع الوقت بيأخركم ويوتركم. 

أنا حليت الاختبار أول شيء النظري، مشيت عليه، ثم حليت العملي، ثم رجعت للنظري للأسئلة اللي ما حليتها أول مره، وكملتها، وخلصت الاختبار في ساعة و 28 دقيقة بالضبط. وأمداني أراجع أغلب الأسئلة. 

العملي ممكن تحتاجون لحله 10 دقائق لو مرة تعودتوا كويس وتدربتوا تمام، وفي أسوء الحالات ممكن يأخذ 25 دقيقة، هي 4 أسئلة، أهم شيء عشان تعدون الاختبار إنكم تحلون سؤالين من الـ4، وما عليكم العملي سهل وبتحلونه كله بإذن الله.

هذا المهم في الاختبار، وتحت بالصورة بتلقون المتطلبات اللي بيتم تقييمكم عليها في الاختبار النظري، أما العملي ما أقدر أعرضها. 

بالتوفيق لكم، والله يجعل اختباركم سهل و مُيسر😊✨ .